“Mae cyrsiau ILM wedi rhoi cymwysterau cydnabyddedig i mi sy’n atgyfnerthu fy mhrofiad fel rheolwr”

Mae’r dysgwr Karl Rudakov wedi gweithio ym maes cyflogadwyedd ers 2005, gan ddechrau fel cynghorydd cyn symud ymlaen i rôl reoli dair blynedd yn ddiweddarach. Gyda mwy na 15 mlynedd o brofiad wrth ei gefn, mae Karl wedi creu gyrfa lwyddiannus ac yn dod â llawer o brofiad i’w rôl. Ond er gwaethaf ei gyfoeth o wybodaeth yn y gwaith, cwblhau cymhwyster Rheoli ILM Lefel 4 gydag ACT yn ddiweddar oedd y tro cyntaf iddo fentro i hyfforddiant allanol cymwysedig.    

Ar hyn o bryd mae Karl yn gweithio fel Rheolwr Cyflenwi yng Nghyngor Dinas Casnewydd ac mae bellach yn gweithio tuag at ei gymhwyster Lefel 5. Tan yn ddiweddar, roedd yn rheoli pedwar prosiect arwyddocaol, gan gynnwys Rhaglen Ailgychwyn y DWP – cynllun cyflogadwyedd blaenllaw llywodraeth y DU – yn ogystal ag amrywiol fentrau Llywodraeth Cymru a’r Gronfa Ffyniant Gyffredin. Mae ei waith yn cynnwys rheoli staff a chyllidebau, monitro perfformiad a chydymffurfiaeth, ac arwain newid sefydliadol. 

“Mae yna lawer o newid o fewn y prosiectau hyn,” meddai Karl. “Pan fydd gennym gwahanol gyllidebau, mae’n aml yn golygu newidiadau i gyflenwi, strwythurau staffio, neu hyd yn oed sut mae’r prosiect yn edrych. Dyna lle mae’r ILM wedi fy helpu mewn gwirionedd – mae wedi rhoi offer newydd i mi weithio gyda nhw.”  

Er gwaethaf ei brofiad helaeth, nid oedd Karl erioed wedi ennill cymhwyster rheoli ffurfiol cyn cofrestru ar yr ILM Lefel 4. Wedi’i annog gan ei bartner busnes AD, gwelodd y cwrs fel ffordd o ddilysu ei sgiliau a diogelu ei yrfa at y dyfodol.  

“Rydw i wedi gwneud llawer o hyfforddiant mewnol, ond dim byd wedi’i achredu. Ac weithiau pan fyddwch chi’n mynd am swyddi, maen nhw’n dweud bod angen gradd neu gymhwyster perthnasol arnoch chi. Does gen i ddim gradd, felly mae hyn yn fy helpu i roi tic yn y bocs hwnnw.” 

Yn amheus ar y cychwyn ynglŷn â dychwelyd i ddysgu strwythuredig, roedd Karl yn gweld y cwrs yn llwybr ymarferol a hygyrch i ddysgu ffurfiol. Gall cydbwyso astudio gyda swydd brysur a bywyd teuluol egnïol fod yn heriol ond gwnaeth ACT a’r cyngor wneud y broses yn hylaw.   

“Mae gennym gytundeb yn y gwaith ein bod yn gallu defnyddio 20% o’n hamser ar gyfer dysgu,” esboniodd. “Mae ACT wedi bod yn wych. Roedd Rachel a Joanna [Fy nhiwtoriaid] yn deall bod fy amser personol yn dynn, felly fe wnaethon nhw fy helpu i ffitio’r gwaith i fy niwrnod gwaith lle bo hynny’n bosibl.”  

Roedd hefyd yn gwerthfawrogi fformat hyblyg y cwrs. “Mae’r cymysgedd o aseiniadau ysgrifenedig a llafar wedi fy helpu i reoli fy amser. Mae’n well gen i’r ochr siarad – rwy’n gallu eistedd a siarad am unrhyw beth – ac rwy’n credu ei fod yn ffordd gyflymach o ddangos yr hyn rydych chi’n ei wybod.”  

Roedd cynnwys y cwrs yn berthnasol i’w rôl ar unwaith. Roedd pynciau fel rheoli newid, iechyd a diogelwch, recriwtio, a chynllunio strategol i gyd yn atseinio â’i gyfrifoldebau dyddiol.  

“Roedd yr uned rheoli newid yn sefyll allan oherwydd bod hynny’n rhan mor fawr o’r hyn rydw i’n ei wneud. Yr un peth gyda recriwtio, rydw i wedi etifeddu prosiectau gyda recriwtio gwael ac mae wedi achosi llawer o broblemau. Mae’r cwrs wedi fy helpu i ddarganfod y bobl iawn, nid yn unig o ran sgiliau ond hefyd o ran ffit tîm.”  

Canmolodd hefyd y modiwlau cynllunio strategol. “Pan oeddem yn cyflwyno prosiectau’r Gronfa Ffyniant Gyffredin, roedd yn rhaid i mi ysgrifennu briffiau cabinet ac achosion busnes i gyfiawnhau ein gwaith. Dyna lle daeth yr elfen cynllunio strategol i mewn. Roeddwn i’n gallu nodi bylchau yn y ddarpariaeth gwasanaethau a gwneud achos dros brosiectau newydd.” 

Canfu hefyd fod offer dadansoddi syml fel SWOT a PESTLE yn gwneud gwahaniaeth. “Mae’r rhain yn eich helpu i gynllunio a chyfiawnhau penderfyniadau. Weithiau maen nhw’n ffordd o wirio’ch hun a gwneud yn siŵr eich bod chi ar y trywydd iawn.”  

Er gwaethaf dysgu llawer o sgiliau newydd yn ystod y cwrs, roedd yn ymwneud hefyd â mireinio’r sgiliau yr oedd Karl eisoes wedi’u casglu trwy gydol ei yrfa.  

“Rydw i wedi bod yn rheoli ers 2008, nid yn unig mae’r cwrs hwn wedi fy helpu i wneud fy ngwaith yn well – mae wedi rhoi cymwysterau cydnabyddedig i mi sy’n atgyfnerthu fy mhrofiad.”  

Er nad oes gan Karl unrhyw gynlluniau i adael ei rôl ar hyn o bryd, mae’n gweld cymwysterau ILM fel rhan allweddol o’i ddatblygiad gyrfa hirdymor. “Mae’n dilysu fy mhrofiad. Os ydw i byth eisiau symud – o fewn y cyngor, i awdurdod lleol arall, neu hyd yn oed i ddiwydiant arall – mae’n rhoi opsiynau i mi.”  

O safbwynt sefydliadol, mae dysgu seiliedig ar waith hefyd wedi bod yn gadarnhaol ar bob lefel weithredol. Esboniodd Jane Westwood, Partner Busnes Adnoddau Dynol yng Nghyngor Dinas Casnewydd: “Mae’r cyngor wedi partneru ag ACT fel ein prif bartner prentisiaethau yn y gweithle ers dros wyth mlynedd bellach.    

“Mae’r arlwy o gymwysterau a gynigir yn cyd-fynd â’r rolau amrywiol ledled y cyngor cyfan – o gasglu sbwriel, i ofal, i gyfrifon, ac iechyd a diogelwch. Bydd wastad cymhwyster priodol sy’n alinio â rôl rhywun.    

“Fe wnaethon ni hefyd gyflwyno prentisiaid i’r cyngor lle roedden ni’n awyddus i recriwtio pobl iau i ymuno â’r awdurdod. Hyd yma rydym wedi llanw dros 45 o rolau prentisiaid gyda nifer yn cyflawni swyddi parhaol.    

“Mae’r ffordd y mae ACT yn cyflwyno eu cymwysterau yn rhoi opsiynau uwchsgilio i’r holl staff- ar gyfer eu rôl bresennol neu ar gyfer eu dilyniant gyrfa.    

“Yng Nghyngor Dinas Casnewydd rydym yn credu mai ein staff yw ein blaenoriaeth gan eu bod yn darparu ein gwasanaethau i’r cyhoedd. Mae cael staff sydd  wedi’u hyfforddi yn caniatáu inni ddarparu’r gwasanaeth gorau posibl, mae ACT yn gweithio gyda’r unigolion a’u rheolwyr i gyflawni hyn.”

Darganfod cyrsiau rheoli yma.