Newyddion
/ Dysgwyr
Fis diwethaf, cydnabuwyd un o ddysgwyr ACT, Ifeoluwa Anipupo, fel Dysgwr Sgiliau Hanfodol y Flwyddyn yn ein Gwobrau Llwyddiant Trwy Sgiliau blynyddol.
Mae’r gwobrau, a gynhaliwyd yng Ngholeg Caerdydd a’r Fro, yn dathlu dysgwyr, tiwtoriaid, cyflogwyr a busnesau sydd wedi helpu i hyrwyddo dysgu seiliedig ar waith ledled Cymru.
Crëwyd y gwobrau i gydnabod pwysigrwydd prentisiaethau a dysgu seiliedig ar waith, nid yn unig fel llwybr addysg a gyrfa dilys i unigolion ond fel arf gweithredol i gyflogwyr.
Dyfarnwyd y wobr aur i Ifeoluwa i gydnabod ei hymroddiad i’w hastudiaethau. Ers cofrestru, mae wedi cwblhau ei holl gymwysterau sgiliau hanfodol mewn prin dau fis a hanner – cyflawniad anhygoel o ystyried bod y targed fel arfer yn naw mis. Roedd ei chyflawniad hyd yn oed yn fwy rhyfeddol o ystyried ei bod yn ddysgwr Saesneg Ail Iaith.
Roedd ei chymwysterau yn cynnwys cyfathrebu, cymhwyso rhif a llythrennedd digidol, ac aeth at y tri a’r un ffocws a brwdfrydedd.
Wrth siarad am ei buddugoliaeth, dywedodd Ifeoluwa: “Mae’n deimlad anhygoel bod wedi ennill gwobr Dysgwr Sgiliau Hanfodol y Flwyddyn gan ei fod yn foment o ddilysu a chydnabod fy ngwaith caled ag ymroddiad.”
Ar hyn o bryd mae Ifeoluwa yn gweithio fel gweithiwr cynnal a chadw yn Ysbyty Athrofaol Llandochau, lle mae’n helpu i gynnal amgylchedd glân a diogel i gleifion, staff ac ymwelwyr.
Mae ei Sgiliau Hanfodol yn rhan o’i chymhwyster Gwasanaethau Cyfleusterau mewn Gofal Iechyd Lefel 2 ac maent wedi meithrin sgiliau y mae’n eu defnyddio bob dydd.
“Mae’r cymwysterau wedi fy arfogi â sgiliau gwell, megis cyfathrebu effeithiol a chydweithredu meddwl agored gyda fy nghydweithwyr a chleifion.”
“Fe wnes i gofrestru ar gyfer y cwrs Gwasanaethau Cyfleusterau mewn Gofal Iechyd Lefel 2 er mwyn gwella fy sgiliau a’m gwybodaeth mewn gofal iechyd, cyfrannu at ddarparu gwasanaethau o ansawdd uchel a datblygu sgiliau gwerthfawr fel cyfathrebu a datrys problemau sy’n hanfodol ar gyfer twf gyrfa ac er mwyn darparu cefnogaeth ardderchog i’m sefydliad.”
Trwy gydol ei rhaglen, mynychodd Ifeoluwa bob sesiwn, gan gyrraedd yn brydlon a chyfrannu’n llawn; cyflawniad trawiadol o ystyried bod y rhan fwyaf o ddysgwyr yn colli o leiaf un sesiwn.
Wrth fyfyrio ar gynnwys y cwrs, teimla bod llythrennedd digidol a chyfathrebu yn arbennig o ddiddorol.
“Mae’r holl gyrsiau yn berthnasol ond roeddwn i’n gweld y cyrsiau llythrennedd a chyfathrebu digidol yn ddiddorol iawn, yn enwedig yn ystod y drafodaeth a’r asesiad grŵp,” meddai.
Mae Ifeoluwa eisoes wedi gallu cymhwyso ei dysgu yn uniongyrchol i gyfrifoldebau ei rôl.
“Rwyf wedi gallu gweithredu rhai o’r sgiliau a’r wybodaeth o’r cwrs yn fy nhasgau beunyddiol. Er enghraifft, rwyf wedi gwella mewn meysydd fel rheoli ac atal heintiau, iechyd a diogelwch a sgiliau cyfathrebu effeithiol.
Canmolodd hefyd y gefnogaeth a gafodd gan ACT trwy gydol ei thaith brentisiaeth.
“Roedd [fy nhiwtoriaid a’m haseswyr] yn darparu arweiniad trwy gydol fy nhaith prentisiaeth ac yn helpu gydag adnoddau a deunyddiau astudio,” meddai. “Mae eu cefnogaeth wedi bod yn ddefnyddiol iawn wrth gydbwyso bywyd gwaith ac astudio.”
Adleisiodd ei chyflogwr y teimlad cadarnhaol hwn, gan ei disgrifio fel aelod gwerthfawr o’r Adran Cadw Tŷ ers ymuno yng ngwanwyn y llynedd. Fe wnaethant ganmol ei safonau glanhau gyson uchel, ei phroffesiynoldeb, a’i hymrwymiad i gwblhau’r holl hyfforddiant gorfodol mewn modd amserol ac effeithiol.
Fe ategon nhw ei bod, dros y saith mis diwethaf, wedi dangos ymroddiad i gynnal y safonau gofynnol a chynnal gwerthoedd ac ymddygiadau sefydliadol, gan ddisgrifio ei chyflawniad fel “gwirioneddol haeddiannol.”
Wrth edrych ymlaen, mae Ifeoluwa yn canolbwyntio ar barhau â’i datblygiad proffesiynol ac ehangu ei chyfraniad yn y sector gofal iechyd.
“Rwy’n gweithio tuag at wella fy sgiliau a’m gwybodaeth trwy gyrsiau fel hyn ac rwy’n gobeithio ymgymryd â mwy o gyfrifoldebau. Yn y tymor hir, byddwn wrth fy modd yn cyfrannu’n sylweddol at weithrediadau’r ysbyty ac archwilio rolau clinigol a gweinyddol gofal iechyd eraill yn y dyfodol.”
Pan ofynnwyd iddi beth fyddai’n ei ddweud wrth eraill sy’n ystyried y cwrs, ychwanegodd: “Byddwn yn argymell y cwrs oherwydd ei fod yn cynnig cyfle gwych i roi hwb i’ch sgiliau a’ch hyder mewn gwasanaethau cyfleusterau gofal iechyd. Byddwch yn
dysgu sgiliau sy’n berthnasol yn uniongyrchol i’ch swydd, mae’n gam cadarn ar gyfer twf gyrfa, ac rydych chi’n derbyn cefnogaeth gan ACT trwy gydol y cwrs.”
