Arwr rygbi yn dathlu cefnogaeth i weithlu’r dyfodol yng Nghymru

Cynhaliodd y darparwyr hyfforddiant Cymraeg, ACT ac ALS, ddigwyddiad ‘diolch’ unigryw i gyflogwyr sydd wedi gweithio gyda nhw i ddarparu cyfleoedd ar gyfer lleoliadau ystyrlon i ddysgwyr a phrentisiaid.

Croesawodd y digwyddiad, a gynhaliwyd yn Ocean Park House yng Nghaerdydd, westai arbennig Jonathan ‘Jiffy’ Davies i drafod byd rygbi.

Cynhaliwyd y sesiwn holi ac ateb clos gan olygydd BusinessIn Wales, Daniel Bevan, a chaniataodd i gynrychiolwyr busnes holi’r arwr rygbi am y newyddion a’r datblygiadau diweddaraf yn y gamp.

Er taw rygbi oedd canolbwynt y bore, agorodd Jiffy’r trafodaethau gan fyfyrio ar ei daith brentisiaeth ei hun.

Disgrifiodd Jiffy ei leoliad prentisiaeth fel ‘dechrau bywyd gwaith’ a rhannodd ‘hebddo, dwi ddim yn gwybod beth fyddai wedi digwydd i fi’.

Aeth ymlaen i esbonio mai agwedd bwysig ar ei leoliad prentisiaeth oedd y sgiliau cymdeithasol a roddodd iddo. “Roedd yn naid o ffydd, mynd o’r ysgol i’r byd gwaith ond fe ddysgodd i fi sut i gyfathrebu’n well a pheidio â bod yn ofnus.”

Gorffennodd Jiffy’r drafodaeth trwy rannu ei ddoethineb.

“Rydw i’n dweud o hyd, nid lle rydych chi’n dechrau sy’n bwysig, ond lle rydych chi’n gorffen”

Roedd y digwyddiad hefyd yn lansiad swyddogol Addewid Cyflogwyr ACT.

Crëwyd yr addewid mewn ymateb uniongyrchol i ystadegau NEET (nid mewn addysg, cyflogaeth na hyfforddiant) Cymru sydd ar hyn o bryd yn 12% ar gyfer pobl ifanc 16 i 24 oed.

Trwy’r addewid, gall sefydliadau ymrwymo i gynnig lleoliadau gwaith a phrofiad gwaith i bobl ifanc 16 i 19 oed o’u rhaglen Twf Swyddi Cymru+.

I gyflogwyr, mae’n ffordd rad ac am ddim o ddarganfod talent newydd, lleihau gorbenion recriwtio, ac adeiladu piblinell o weithwyr at y dyfodol. Mae hefyd yn ffordd o ddarparu profiad a allai newid bywyd person ifanc talentog a allai gael eu hanwybyddu fel arall.

Dywedodd Cyfarwyddwr ACT ac ALS, Helen Williams: “Mae angen mawr am gefnogaeth gan gyflogwyr. Gall hyn fod ar ffurf sesiynau blasu profiad gwaith, lleoliadau, rhoi cyflwyniadau am eich diwydiant neu hyd yn oed gynnig sesiynau hyfforddi i helpu pobl ifanc i baratoi ar gyfer cyfweliadau.

“Gall busnesau helpu i fowldio gweithlu’r dyfodol yng Nghymru, nid yn unig er budd eu gweithrediadau a’r dysgwr unigol, ond er mwyn iechyd a ffyniant economi Cymru gyfan.”

Gallwch ddod o hyd i ragor o wybodaeth am yr Addewid Cyflogwyr ar wefan ACT.