Mae Bethan Maund, Pennaeth Prentisiaethau yn ACT, yn dweud na fu erioed amser gwell i’r gweithlu uwchsgilio nag yn awr. Gyda Coronafeirws yn gorfodi busnesau, ysgolion a’r system addysg gyfan i gau dros dro, rydym yn cael ein gorfodi i addasu a dod o hyd i atebion newydd i’r argyfwng.
Gyda Cymwysterau Cymru a’r cyrff dyfarnu yn gweithio’n agos gyda darparwyr hyfforddiant i gyhoeddi canllawiau newydd ar addasiadau i ddulliau asesu, mae’n debyg y bydd dysgu digidol yn dod yn nodwedd ganolog mewn dysgu a datblygu wrth symud ymlaen. Gyda’r byd o’n cwmpas yn newid yn gyflym, mae’n amser gwych i gyflogwyr ystyried sut y gallant addasu a datblygu, nid yn unig fel busnes, ond hefyd y ffordd orau iddynt lenwi bylchau mewn sgiliau gan ddefnyddio eu gweithwyr.
Dyma bedair yn unig o nifer o ffyrdd mae dysgu digidol yn ffordd effeithiol o uwchsgilio ar gyfer y dyfodol.
Ymgysylltu uwch
Mae astudiaethau gan IBM wedi dangos bod cyfranogwyr yn dysgu pum gwaith yn fwy o ddeunydd mewn cyrsiau dysgu ar-lein gan ddefnyddio cynnwys amlgyfrwng nag mewn cyrsiau wyneb yn wyneb traddodiadol. Gyda llawer ohonom yn cydbwyso bywydau prysur, mae rhoi’r annibyniaeth a’r rheolaeth i ddysgwyr i ffitio eu hastudio o amgylch eu hamserlenni eu hunain, yn eu galluogi i weithio ar eu cyflymder eu hunain. Yn gyffredinol, mae dysgwyr yn gweithio’n gyflymach ar-lein nag y byddent fel arall, ac yn aml yn llyncu mwy o wybodaeth. Mae pryderon na fydd gweithwyr yn ymrwymo ac yn gwneud y gwaith yn gwbl ddi-sail. Mae 98% o’r dysgwyr ar ein rhaglenni Prentisiaeth yn ymgysylltu ar-lein. Fel arfer, mae pobl yn brysur yn y gwaith ac mae’n anodd iddyn nhw ddod o hyd i’r amser i gwblhau darn o waith neu wneud asesiad. Mae’r cyfyngiadau symud a gweithio o bell o gartref, wedi galluogi ein dysgwyr i gwblhau gwaith cwrs yn eu hamser eu hunain a bwrw ymlaen gyda’u cymwysterau.
Hygyrchedd
Mae dysgwyr yn aml yn ei chael hi’n anodd cydbwyso eu llwyth gwaith â bywyd cartref, ac amserlennu mewn pryd i fynychu cyrsiau sy’n gysylltiedig â gwaith. Gall yr amser sy’n cael ei dreulio yn teithio i ddosbarthiadau ac oddi yno fod yn rhwystr i ddysgu i gyflogwyr a gweithwyr fel ei gilydd. Fe wnaeth adroddiad Brandon Hall ar eDdysgu ganfod o fewn corfforaethau fod dysgu o bell fel arfer yn gofyn am 40-60% yn llai o amser gweithwyr na dysgu mewn lleoliad ystafell ddosbarth traddodiadol. Mae hefyd yn golygu y gall dysgwyr dorri eu gwaith yn ddarnau a gweithio ar rannau o’u cwrs ar adegau sy’n gweithio orau iddyn nhw.
Cymorth digidol rhyngweithiol
Mae pryderon yn aml y gall dysgu o bell fod yn brofiad ynysig. Gyda Microsoft Teams, Google Classrooms, Nearpod ac amrywiaeth eang o lwyfannau digidol ac offer cymorth dysgu nawr ar gael, nid yw erioed wedi bod yn fwy difyr i ddysgu ar-lein. Gan ddefnyddio Classroom Nearpods (profiad dysgu rhyngweithiol sy’n ennyn diddordeb pawb ar eu dyfeisiau ar yr un pryd) mae’r dysgwyr yn cael cwisiau a chydweithrediadau amser real lle gallan nhw bostio atebion a chwestiynau’n ddienw a chael adborth ar unwaith. Gall aseswyr weld pwy sy’n anfon yr atebion a thynnu sylw at y meysydd mae myfyrwyr yn cael trafferth â nhw a darparu mwy o wybodaeth. Mae’n dileu’r ofn o siarad yn gyhoeddus ac mae’n ffordd wych o fagu hyder i ddysgwyr. Mae defnyddio technoleg wrth addysgu nid yn unig yn gwella sgiliau a gwybodaeth ddigidol y dysgwyr eu hunain, ond mae wir yn gwella
profiad y dysgwyr. Mae’n rhoi mwy o gyfrifoldeb i ddysgwyr am eu profiad dysgu ac yn osgoi llawer o ddryswch. Mae hefyd yn helpu i gadw profiad yr ystafell ddosbarth yn ffres ac yn gyffrous i aseswyr hefyd.
Asesu rheolaidd
Yn ogystal â dysgu ar eu cyflymder eu hunain, mae dysgu ar-lein hefyd yn golygu bod asesiadau’n dod yn rhan fwy cyson a pharhaus o’r broses. Mae hyn yn newyddion da i fyfyrwyr gan fod asesu rheolaidd a gwirio gydag aseswyr yn gallu gwella ymgysylltiad myfyrwyr ac yn galluogi cyflogwyr i weld pa mor dda mae eu gweithwyr yn dod yn eu blaenau. Mae hefyd yn galluogi aseswyr i sylwi pan fydd dysgwr yn cael trafferth a chamu i mewn i roi cymorth a chefnogaeth.
Rydym yn buddsoddi’n helaeth mewn cynnig datrysiadau digidol a dewisiadau amgen i gyflogwyr a dysgwyr sy’n ceisio gwella sgiliau eu gweithlu. Gyda’r byd o’n cwmpas yn newid yn gyson, nid oes rhaid dweud bod rhaid i addysg symud gyda’r oes hefyd. Wrth ymrestru gyda ni, mae 100% o’r dysgwyr prentisiaeth yn derbyn portffolio digidol OneFile wrth gofrestru. Mae’r portffolio hwn yn cynnwys holl raglenni ymsefydlu a chynnwys y fframwaith. Mae’r system ar gael fel llwyfan ar-lein ac fel ap ffôn symudol, ac mae hwylustod a hygyrchedd yn galluogi pob dysgwr sydd heb fawr o brofiad o dechnoleg i gael mynediad i’w portffolio naill ai o’u ffôn neu ar eu bwrdd gwaith. Mae aseswyr yn darparu cymorth tiwtorial un i un dros y ffôn a thrwy fideo-gynadledda. Yr hyn sy’n wych am ddysgu ar-lein yw y gall dysgwyr gyflawni asesiadau a meini prawf gwybodaeth drwy’r system OneFile ar gyflymder sy’n gweithio iddyn nhw. Mae’r system a’r gweithdrefnau hefyd yn caniatáu i gyflogwyr a rheolwyr gymryd rhan weithredol yn y rhaglen a monitro sut mae gweithwyr yn dod yn eu blaenau.
I gael gwybod mwy am y cymwysterau rydym yn eu cynnig, ewch i: https://acttraining.org.uk/apprenticeship-employers
