Polisi Cydraddoldeb ac Amrywiaeth – Dysgwyr ac Ymwelwyr (Grŵp CAVC)

Ymrwymiad

Fel darparwr addysg a hyfforddiant, bydd Grŵp Coleg Caerdydd a’r Fro yn gweithredu polisïau a gweithdrefnau sy’n diwallu anghenion ein cymunedau drwy hyrwyddo cynhwysiant a mynd i’r afael ag anghydraddoldebau.

Mae’r Grŵp yn ymdrechu i ddileu gwahaniaethu a goresgyn yr anfanteision sy’n bodoli mewn cymdeithas, sydd wedi arwain at drin rhai grwpiau’n llai ffafriol nag eraill. Mae gan y Grŵp gyfrifoldeb i ddarparu cyfleoedd i unigolion gyflawni eu potensial mewn amgylchedd diogel a sicr sy’n rhydd rhag gwahaniaethu. Mae’n rhaid i’r Grŵp hefyd sicrhau ei fod yn gynrychioliadol o’r gymuned y mae’n ei gwasanaethu ac yn diwallu anghenion y gymuned hon.

Mae’r Grŵp wedi ymrwymo i hyrwyddo cyfle cyfartal mewn perthynas â rhywedd, oedran, anabledd, hil, crefydd a chred, cyfeiriadedd rhywiol, ailbennu rhywedd, beichiogrwydd a mamolaeth, a phriodas/partneriaeth sifil.

Mae gan bob rheolwr, aelod o staff, dysgwr, contractwr, ymwelydd ac eraill sy’n ymwneud â’r Grŵp neu’n ymgysylltu ag ef gyfrifoldeb i ymddwyn mewn modd sy’n parchu ac yn cefnogi ethos ein Grŵp cynhwysol a’n hymrwymiad i gyfleoedd teg ar gyfer dysgu a chyflogaeth. Mae’r ddyletswydd hon yn berthnasol i unigolion pan fyddant ar ein safleoedd a thu allan iddynt, ac mae’n cynnwys defnyddio’r rhyngrwyd a dyfeisiau cyfathrebu electronig megis e-bost, ffonau symudol, consolau gemau, safleoedd rhwydweithio cymdeithasol ac ati, waeth pwy sy’n berchen ar y ddyfais gyfathrebu.

Cwmpas a Diben y Polisi

Mae’r Grŵp yn derbyn yn llawn ei gyfrifoldebau allweddol o dan Ddeddf Cydraddoldeb 2010 i:

Ddileu gwahaniaethu, aflonyddu, erledigaeth ac ymddygiad anghyfreithlon arall.
Hyrwyddo cyfle cyfartal drwy ddileu neu leihau anfanteision, cymryd camau i ddiwallu anghenion, ac annog cyfranogiad mewn bywyd cyhoeddus lle mae cyfranogiad yn anghymesur o isel.
Meithrin cysylltiadau da drwy fynd i’r afael â rhagfarn a hyrwyddo dealltwriaeth.

Cydnabu Deddf Cydraddoldeb 2010 fod anghydraddoldeb a gwahaniaethu’n parhau, a chyflwynodd hawliau pellach a rhwymedigaethau newydd i gyrff cyhoeddus.

Mae’r polisi hwn wedi’i seilio ar weledigaeth y Grŵp – Ysbrydoledig, Cynhwysol a Dylanwadol – a bydd yn cefnogi ein gwaith tuag at brif ysgogwyr Ansawdd, Effeithlonrwydd a Thwf. Bydd y polisi’n ymgorffori’r egwyddorion canlynol:

Bydd dysgwyr yn cael eu cefnogi i’w galluogi i gyflawni eu potensial tra byddant yn dysgu, mewn amgylchedd sy’n dileu neu’n lleihau anfantais, yn cymryd camau i ddiwallu eu hanghenion ac yn annog cyfranogiad.
Byddwn yn cefnogi dysgwyr i ddatblygu’r sgiliau sydd eu hangen arnynt i symud ymlaen yn llwyddiannus drwy gydol eu bywydau.
Ymrwymiad i’r model cymdeithasol o anabledd, lle rydym yn edrych ar ddileu’r rhwystrau y gallai rhywun eu hwynebu oherwydd eu hanabledd neu anhawster dysgu er mwyn hyrwyddo cynhwysiant.

Nod y polisi hwn yw:

Sicrhau bod gweithdrefnau cysylltiedig yn cael eu rhoi ar waith i sicrhau bod y polisi hwn yn cael ei weithredu ar draws y Grŵp. Bydd hyn yn cynnwys mecanwaith i sicrhau bod egwyddorion y polisi hwn wedi’u hymgorffori ym mhob polisi’r Grŵp.
Nodi staff cyfrifol – bydd hyn yn cynnwys nodi uwch reolwr â chyfrifoldeb strategol ac unigolion â chyfrifoldeb gweithredol dros faterion cydraddoldeb ac amrywiaeth. Bydd materion Cydraddoldeb ac Amrywiaeth yn cael eu hadrodd i’r Llywodraethwyr drwy’r Bwrdd Safonau Ansawdd. Bydd hefyd strwythur pwyllgor priodol i sicrhau cyfranogiad effeithiol gan randdeiliaid allweddol.
Cyhoeddi Cynllun Cydraddoldeb Strategol fel ffordd o wella profiad staff a dysgwyr a datblygu ein Dyletswydd Cydraddoldeb y Sector Cyhoeddus drwy gyflawni unrhyw nodau neu dargedau. Bydd cynnydd yn erbyn y cynllun hwn yn cael ei ddiweddaru’n flynyddol.
Ymgysylltu â rhanddeiliaid sy’n cynrychioli’r holl nodweddion gwarchodedig wrth osod ac adolygu ein hamcanion cydraddoldeb.
Dyrannu adnoddau priodol i gefnogi gweithredu’r Cynllun Cydraddoldeb Strategol hwn.
Monitro a chyhoeddi data perthnasol sy’n ymwneud â materion cydraddoldeb o fewn y Grŵp fel rhan o’n Dyletswydd Sector Cyhoeddus yn flynyddol. Bydd y data hwn yn cael ei ddadansoddi’n llawn a bydd cynlluniau gweithredu’n cael eu datblygu i oresgyn unrhyw batrymau o dangynrychiolaeth, tanberfformiad neu anfodlonrwydd.
Ystyried mesurau gweithredu cadarnhaol a ganiateir gan y gyfraith i unioni anfanteision mewn cyflogaeth neu ddarpariaeth addysg a ddatgelir drwy fonitro.
Cynnal asesiadau effaith i archwilio polisïau, gweithdrefnau ac arferion er mwyn sicrhau bod cydraddoldeb wedi’i ymgorffori yn y polisïau hyn ac nad oes unrhyw effaith negyddol ar y nodweddion gwarchodedig. Bydd targedau a osodir yn ystod cyfarfodydd Asesiadau Effaith ar Gydraddoldeb yn cael eu defnyddio i leihau effaith wahaniaethol neu rannu effaith gadarnhaol.
Sicrhau bod rhaglen yn cael ei gweithredu i hyrwyddo amrywiaeth a meithrin cysylltiadau da ar draws y Grŵp.
Datblygu deunyddiau priodol i godi ymwybyddiaeth o gyfle cyfartal a chynhwysiant ar draws y Grŵp i sicrhau bod pob aelod o staff, myfyriwr, ymwelydd a rhanddeiliad yn ymwybodol o’r materion dan sylw a’u cyfrifoldebau.
Cymryd camau i sicrhau bod gweithdrefnau ar waith fel bod honiadau o wahaniaethu a bwlio ac aflonyddu yn cael eu trin yn gyflym, eu hymchwilio’n llawn ac mewn modd amserol, a bod unigolion yn cael eu cefnogi drwy’r broses.

Yn ogystal, fel darparwr addysg a hyfforddiant, bydd y Grŵp yn gwneud pob ymdrech i:

Gynhyrchu deunyddiau sy’n hygyrch, yn gynhwysol ac yn ddealladwy.
Gweithredu gweithdrefn dderbyn a fydd yn cynghori ac yn arwain darpar fyfyrwyr, gan ystyried addasiadau rhesymol, beth bynnag fo’u hanghenion, gan hyrwyddo cynhwysiant a gwella cysylltiadau â phob sefydliad y gallai myfyrwyr symud ymlaen atom ohonynt.
Datblygu deunyddiau a chyfleoedd i sicrhau bod ein dysgwyr yn ymwybodol o’u cyfrifoldebau o dan ddeddfwriaeth cydraddoldeb ac yn datblygu ymddygiad sy’n cyd-fynd ag egwyddorion cynhwysiant. Bydd hyn yn codi ymwybyddiaeth o wahaniaethau pobl ac yn chwalu’n weithredol unrhyw rwystrau sy’n deillio o ddiffyg dealltwriaeth o’r gwahaniaethau hyn.
Sicrhau bod pob myfyriwr yn cael y cymorth sydd ei angen arnynt i symud ymlaen.
Datblygu arferion addysgu a dysgu cynhwysol ar gyfer pob dysgwr.
Sicrhau bod cyfleusterau’n hygyrch.
Gynhyrchu deunyddiau sy’n hygyrch, yn gynhwysol ac yn ddealladwy.
Bod â gweithdrefn ar gyfer delio â chwynion ffurfiol sy’n ymwneud â chyfle cyfartal.

Byddwn yn sicrhau bod dysgwyr ar bob lefel a math o ddarpariaeth yn cael eu cyfeirio’n glir at unrhyw sefydliad neu gorff allanol sy’n goruchwylio darpariaeth, safonau, disgwyliadau neu unioni cam, megis corff dyfarnu, y QAA neu Swyddfa’r Dyfarnwr Annibynnol ar gyfer Addysg Uwch, nid yw’r rhestr hon yn gynhwysfawr.

Bydd y Corff Llywodraethu yn gyfrifol am sicrhau bod:

Y Polisi yn cael ei adolygu’n rheolaidd, yn unol â thelerau adolygu’r polisi, a bod cyngor priodol yn cael ei roi ar y cynnwys. Bydd y Prif Fwrdd yn cymeradwyo’r polisi.

Mae’r Uwch Reolwyr yn gyfrifol am:

Adolygu’r Polisi hwn a’r gweithdrefnau cysylltiedig, gan gynnwys y Cynllun Cydraddoldeb Strategol.
Monitro ac ymateb i ddata ansawdd a pherfformiad sy’n gysylltiedig â chydraddoldeb ac amrywiaeth. Defnyddio’r dadansoddiad hwn o ddata i lywio cynllunio yn y dyfodol er mwyn gwella cynrychiolaeth, cyfranogiad a llwyddiant grwpiau sydd wedi’u tangynrychioli ac sy’n tanberfformio, a herio stereoteipio.
Sicrhau bod digon o gyllideb yn cael ei darparu ar gyfer gweithgareddau datblygiad proffesiynol.
Sicrhau bod digon o gyllideb yn cael ei darparu ar gyfer adnoddau sy’n cefnogi’r polisi hwn.
Trin unrhyw fath o wahaniaethu, aflonyddu, erledigaeth neu radicaleiddio a gyflawnir gan unigolyn fel mater posibl ar gyfer camau disgyblu.

Mae staff Ansawdd uwch yn gyfrifol am:

Cynnal cyfredoldeb y polisi hwn a’r gweithdrefnau cysylltiedig.
Darparu hyfforddiant, datblygiad a chymorth priodol i staff er mwyn sicrhau eu bod yn gallu dilyn y polisi.
Sicrhau bod camau priodol yn cael eu cymryd i fonitro data sy’n gysylltiedig â’r polisi hwn, a bod y data hwn yn cael ei ddefnyddio i lywio a gwella arfer.

Mae pob aelod o staff yn gyfrifol am:

Weithredu yn unol â’r Polisi hwn a’r gweithdrefnau cysylltiedig.
Ymdrin â phob honiad o wahaniaethu, aflonyddu ac erledigaeth yn sensitif, ac ymchwilio’n deg ac yn drylwyr.
Sicrhau bod cydraddoldeb ac amrywiaeth wedi’u hymgorffori ym mhob agwedd ar ein rhaglenni.
Sicrhau bod dysgu’n digwydd mewn amgylchedd cefnogol sy’n rhydd rhag gwahaniaethu neu aflonyddu, gan hyrwyddo Gwerthoedd Prydeinig.
Arwain drwy esiampl.
Helpu dysgwyr i wella eu harferion cydraddoldeb ac amrywiaeth.
Mynychu digwyddiadau datblygiad proffesiynol perthnasol a manteisio ar y cyfleoedd sydd ar gael iddynt i ddatblygu eu dealltwriaeth o gydraddoldeb, amrywiaeth a chynhwysiant.

Mae pob dysgwr yn gyfrifol am:

Drin dysgwyr eraill, staff a rhanddeiliaid ag urddas a pharch.
Peidio â gwneud unrhyw beth a fyddai’n gwahaniaethu yn erbyn eraill neu’n eu haflonyddu oherwydd eu hil, rhywedd, anabledd, oedran, cyfeiriadedd rhywiol, crefydd, cefndir personol neu amgylchiadau.
Rhoi gwybod am unrhyw fwlio neu aflonyddu.
Mynychu digwyddiadau gwybodaeth yn ystod y cyfnod sefydlu i sicrhau eu bod yn ymwybodol o’r polisi hwn a’i oblygiadau iddynt.
Gweithredu yn unol â’r polisi hwn ac unrhyw weithdrefnau cysylltiedig.

Deddf Cydraddoldeb 2010
Dyletswydd Cydraddoldeb y Sector Cyhoeddus

Yn unol â gweithdrefnau’r Grŵp, ysgrifennwyd y Polisi hwn gan ystyried effaith unigolion yn unol â Deddf Cydraddoldeb.

Mae’r polisi hwn yn rhoi cyfleoedd i bobl ddefnyddio’r iaith Gymraeg neu’r Saesneg. Mae’r dyletswyddau sy’n deillio o’r Safonau yn golygu na ddylai sefydliadau drin y Gymraeg yn llai ffafriol na’r Saesneg, ynghyd â hyrwyddo a hwyluso defnyddio’r iaith Gymraeg h.y. ei gwneud hi’n haws i bobl ei defnyddio yn eu bywydau bob dydd.

Mae fersiwn Gymraeg o’r ddogfen hon ar gael.

Cyhoeddir y polisi hwn ar wefan y cwmni.
Mae’r polisi hwn wedi’i storio ar fewnrwyd y cwmni.
Rhennir y polisi hwn gyda dysgwyr.

Adolygir y polisi hwn bob 2 flynedd.

Rheolwr Cyfrifol: Deon Ansawdd
Arweinydd Gweithredol: Dirprwy Bennaeth
Hygyrch i Fyfyrwyr: Ydw

Dyddiad cymeradwyo: 7 Gorffennaf 2020
Cymeradwywyd gan: Prif Fwrdd
Dyddiad yr Adolygiad Nesaf: Gorffennaf 2022

Rhif yr Adolygiad: 1
Dyddiad yr Adolygiad: Gorffennaf 2020
Dyddiad yr Adolygiad Nesaf: Gorffennaf 2022

Mae’r polisi hwn yn berthnasol i bob dysgwr ar bob rhaglen ddysgu, waeth beth fo’r dull neu’r lleoliad astudio.
Mae’r polisi hwn yn berthnasol i bob partner, rhanddeiliad a sefydliad masnachfraint.
Mae’r polisi hwn yn berthnasol i ymwelwyr â’r Grŵp.

Polisi Cydraddoldeb ac Amrywiaeth