Dysgwyr a chyflogwyr ALS yn cael eu cydnabod yng Ngwobrau Llwyddiant Drwy Sgiliau

Mae ALS yn dathlu cyflawniadau ei gymuned ar ôl i dri ar ddeg o’i ddysgwyr a’i gyflogwyr ennill gwobrau yng Ngwobrau Llwyddiant Drwy Sgiliau.

Roedd y seremoni, a gynhaliwyd yng Ngholeg Caerdydd a’r Fro ar 6 Chwefror, yn cydnabod dysgwyr a chyflogwyr ledled Cymru sydd wedi rhagori ar eu taith dysgu seiliedig ar waith.

Er bod y gwobrau’n canolbwyntio’n bennaf ar brentisiaethau a chyflawniadau cyflogwyr, roedd hefyd nifer o gategorïau yn dathlu cyflawniadau mwy penodol.

Enillodd y prentis sylfaen, Dafydd Robinson, wobr aur yng nghategori Prentis Sylfaen y Flwyddyn, gan ddangos ymroddiad cryf i’w astudiaethau sydd wedi creu argraff ar ei gyflogwyr. O arwain prosiectau a symleiddio cyfrifon cwsmeriaid i addysgu staff am dechnolegau newydd, mae Dafydd wedi cyflawni canlyniadau mesuradwy yn ei waith. Nodwyd ei fod wedi dangos gallu ‘eithriadol’ i addasu, gan gydbwyso gwaith, astudio a heriau personol heb golli momentwm.

Roedd Ethan Evans hefyd yn enillydd mawr i ALS, gan ennill gwobr aur yng nghategori Prentis y Flwyddyn. Ers dechrau ei brentisiaeth TGCh yn 2022, mae Ethan wedi croesawu her rôl sy’n wynebu cwsmeriaid, gan ddatblygu ei sgiliau technegol a’i allu i gyfathrebu.

Enillydd aur arall oedd Hazel Eldridge, a enillodd wobr Prentis Uwch y Flwyddyn. Mae arweinyddiaeth ac arbenigedd technegol Hazel wedi sbarduno twf rhyfeddol yn ei sefydliad, Gwasanaethau Yswiriant FUW. Ar ôl dechrau fel Gweinyddwr Cyfrifon, mae Hazel wedi symud ymlaen i fod yn Rheolwr Gweinyddiaeth, gan oruchwylio 32 o Weinyddwyr Cyfrifon ledled Cymru. Mae ei gwelliannau strategol i brosesau a’i mentrau datblygu staff wedi cyfrannu at gynnydd o £2 filiwn mewn GPI o fewn 12 mis, gan gynnwys y swm uchaf erioed o £2 filiwn ym mis Hydref diwethaf yn unig.

Enillydd aur olaf ALS y noson oedd Trafnidiaeth Cymru, a enillodd wobr Cyflogwr Mawr y Flwyddyn.

Mae ALS a Thrafnidiaeth Cymru wedi bod yn cydweithio i ddatblygu cyfleoedd prentisiaeth ledled y wlad ymhellach. Gan gynnig cyfleoedd mewn meysydd fel peirianneg, rheoli prosiectau, TG ac Adnoddau Dynol, cafodd Trafnidiaeth Cymru ei chydnabod am gefnogi llif amrywiol o dalent.

Gyda chyfradd cwblhau prentisiaethau o 97%, mae’r sefydliad yn cyfuno technolegau blaengar, mentora cadarn a dysgu hyblyg i rymuso prentisiaid. Mae mentrau sy’n hyrwyddo amrywiaeth a chynhwysiant, gan gynnwys recriwtio wedi’i dargedu a chymorth wedi’i deilwra, yn sicrhau cyfleoedd i bawb.

Cafodd ALS ei gynrychioli ymhellach ar y noson gan yr enillwyr arian Mairi Richards (Prentis Sylfaen y Flwyddyn), Faye Morgan (Prentis y Flwyddyn), a Chyngor Caerdydd (Cyflogwr Mawr y Flwyddyn).

Y rhai ar y rhestr fer a gafodd Ganmoliaeth Uchel oedd Kelly Hillstrip (Prentis Sylfaen y Flwyddyn), Carmel Albiston (Prentis y Flwyddyn), Alex Jehu a Jonathan Dixon (Prentisiaid Uwch y Flwyddyn), a phs Group (Cyflogwr Mawr y Flwyddyn).

Wrth fyfyrio ar lwyddiant cynrychiolwyr y sefydliad yn y gwobrau, dywedodd Sarah John, Cyfarwyddwr ALS: “Mae straeon llwyddiant ein dysgwyr a’n cyflogwyr yn dyst i wydnwch, ymroddiad a grym trawsnewidiol dysgu seiliedig ar waith. Mae eu llwyddiannau’n profi y gall prentisiaethau newid bywydau ar raddfa fawr, ac mae ALS yn falch o’u cefnogi yn eu hymdrechion.”