Tueddiadau yn y gweithle y byddwn yn eu gweld yn 2026

Newidiodd y dirwedd broffesiynol yn sylweddol yn 2025. Daeth deallusrwydd artiffisial yn un o’r diwydiannau a oedd yn tyfu gyflymaf, ochr yn ochr â’r sectorau technoleg gwybodaeth a seiberddiogelwch. Mae’r newid technolegol hwn wedi gorfodi busnesau ledled Cymru i addasu eu ffyrdd o weithio a dod o hyd i ymatebion arloesol i heriau’r diwydiant.

Dyma’r hyn y gallwn ddisgwyl ei weld dros y 12 mis nesaf, a sut y gallai hyfforddiant eich helpu i gynllunio ar gyfer y dyfodol.

Bydd AI ac awtomeiddio yn parhau i dyfu

Dros yr ychydig flynyddoedd diwethaf, mae gweithio hybrid ac o bell wedi dod yn rhan hanfodol o’r rhan fwyaf o sefydliadau. Drwy gydol 2024-25, bu’n rhaid i weithwyr a busnesau addasu’n gyflym i’r dirwedd ddigidol, gyda llawer yn defnyddio prentisiaethau fel Sgiliau Digidol ar gyfer Busnes a Cymorth Cymwysiadau Digidol i roi’r wybodaeth a’r offer sydd eu hangen ar eu staff i ddefnyddio’r llwyfannau hyn yn hyderus.

Ar gyfer 2026, rydym yn rhagweld y bydd cymwysterau digidol uwch, gan gynnwys Dadansoddwr Seiberddiogelwch, Dadansoddeg Data, Datblygwr Meddalwedd ac AI, yn dod yn fwy poblogaidd wrth i fusnesau ddechrau meistroli amgylcheddau digidol a dod yn fwy ymwybodol o’r cyfleoedd twf posibl y gall sgiliau arbenigol eu cynnig.

Mae AI, yn benodol, yn cynnig cyfle cyffrous i fusnesau eleni. O bersonoli drwy AI i awtomeiddio ac effeithlonrwydd, mae sefydliadau’n dechrau buddsoddi’n helaeth mewn meddalwedd AI a strategaethau sy’n canolbwyntio ar AI. Yn ôl adroddiad Gweithlu Byd-eang y Dyfodol 2025 Grŵp Adecco, mae gweithwyr yn treulio dwy awr y dydd ar gyfartaledd yn defnyddio offer AI, ond dim ond 25% sy’n derbyn hyfforddiant AI ffurfiol gan eu cyflogwyr.

Diwylliant gweithle sy’n canolbwyntio ar weithwyr

Eleni, rydym yn disgwyl gweld parhad yn y newid mewn diwylliant gweithle a welwyd drwy gydol 2025. Wrth i weithio hybrid ddod yn arferol, daeth busnesau o hyd i ffyrdd newydd o ymgysylltu â staff, gan ddatblygu strategaethau lles a pholisïau cadw gweithwyr er mwyn cynnal morâl, effeithlonrwydd ac ymgysylltiad ar lefel uchel. Mae Mynegai Gwaith Da CIPD ar gyfer 2025 yn nodi bod ymreolaeth mewn swydd yn gysylltiedig yn gryf â pherfformiad ac iechyd meddwl gwell. Pan fydd staff yn gweld cyfleoedd clir ar gyfer datblygiad a dilyniant, maent yn ymgysylltu’n fwy ac yn llai tebygol o adael y busnes.

Mae’r mynegai hefyd yn dangos, pan fydd cyflogwyr yn buddsoddi’n gyson mewn datblygiad proffesiynol parhaus a hyfforddiant ychwanegol yn y gweithle, fod gweithwyr yn teimlo eu bod yn cael eu gwerthfawrogi’n fwy, yn gweithio’n fwy effeithlon ac yn fwy tebygol o aros yn y sefydliad.

Cynaliadwyedd a’r agenda Sero Net

Mae Cyllideb Garbon 2026 yn targedu gostyngiad cyfartalog o 58% mewn allyriadau nwyon tŷ gwydr ledled Cymru erbyn 2030 o gymharu â lefelau 1990. Mae hyn yn gweithredu fel y cam gwirio nesaf i fusnesau yn unol ag agenda sero net Cymru.

Mae’r economi werdd yn cynrychioli her a chyfle i fusnesau yng Nghymru wrth i ni i gyd geisio lleihau allyriadau ym mhob maes. Mae rhaglenni hyfforddi mewn pynciau perthnasol fel rheoli carbon, neu gyrsiau cynaliadwyedd achrededig, yn rhoi’r wybodaeth a’r sgiliau ymarferol sydd eu hangen ar ddysgwyr i gefnogi ymdrechion datgarboneiddio – gan egluro’r jargon sy’n aml yn ddryslyd a chynnig atebion hawdd eu mabwysiadu ar gyfer anghenion busnes unigol. Mae ein chwaer-gwmni, ACT, yn cynnig amrywiaeth o gymwysterau gwyrdd wedi’u hariannu’n llawn i weithwyr cymwys, gan gynnwys cyrsiau byr wedi’u hachredu gan ISEP a’r cymhwyster prentisiaeth Rheoli Ynni a Charbon llawn.

Newidiadau i Gaffael a Chyflenwi

Ar 24 Chwefror 2025, daeth Deddf Caffael 2023 i rym, gan drawsnewid y ffordd y mae cyrff cyhoeddus ledled Cymru a Lloegr yn prynu nwyddau a gwasanaethau.

Eleni, cyhoeddodd Llywodraeth y DU Ganllaw Byr i Gyflenwyr i helpu busnesau i ddeall y newidiadau a gyflwynwyd gan y Ddeddf a sut i lywio’r ddeddfwriaeth newydd. Y nod yw sicrhau mwy o dryloywder, gwell goruchwyliaeth a mwy o hyblygrwydd i fusnesau – gan greu system decach a mwy cyfartal i gyflenwyr o bob maint.

Er y disgwylir i fusnesau elwa ar broses gaffael fwy syml, mae’r diwygiadau hefyd yn cyflwyno heriau newydd ar gyfer 2026. Mae’r rhain yn cynnwys rhwymedigaethau cydymffurfio newydd, mwy o gystadleuaeth a mwy o angen am reoli risg. Mae cymwysterau fel y rhaglen Caffael a Chyflenwi sydd wedi’i hachredu gan CIPS yn rhoi’r sgiliau sydd eu hangen ar staff i lywio’r newidiadau a’u defnyddio i greu cyfleoedd twf newydd.

Hyfforddiant proffesiynol ar bob lefel

Gall cymwysterau proffesiynol fod yn hynod arbenigol. Mae Adroddiad Baromedr Busnes 2025 gan y Brifysgol Agored yn dangos bod galw mawr gan gyflogwyr am sgiliau sy’n gysylltiedig ag AI a/neu TG, fel dadansoddi data a datblygu meddalwedd, gan eu bod yn deall bod arbenigedd technegol yn biler hanfodol i lwyddiant busnes.

Fodd bynnag, mae 54% o gyflogwyr y DU yn nodi bod prinder sgiliau yn eu sefydliad ar hyn o bryd, ac maent yn rhagweld y bydd hyn yn gwaethygu dros y pum mlynedd nesaf. Mae’r prinder hwn yn effeithio ar bob maes busnes, yn cynyddu llwyth gwaith aelodau presennol o staff ac yn lleihau cynhyrchiant a thwf.

Yn 2026, rydym yn annog mwy o sefydliadau i symud eu ffocws at gymwysterau lefel uchel, gweithredol ac yn seiliedig ar gymhwysedd er mwyn mynd i’r afael â’r heriau hyn a chydnabod bod hyfforddiant yn hanfodol i weithrediadau busnes effeithiol.