ACT yn derbyn canmoliaeth gan Estyn

Mae darparwr addysg seiliedig ar waith mwyaf Cymru, ACT, wedi derbyn adroddiad disglair gan Estyn, arolygiaeth addysg a hyfforddiant Cymru, gan gydnabod ei ddarpariaeth prentisiaethau o ansawdd uchel ledled y wlad.

Mae’r adroddiad, a gyhoeddwyd ym mis Mai, yn tynnu sylw at berfformiad eithriadol ACT mewn meysydd allweddol gan gynnwys ymgysylltu â dysgwyr, dilyniant, a chefnogaeth i’r rhai sydd ag anghenion dysgu ychwanegol. Canmolodd arolygwyr Estyn frwdfrydedd ac ymrwymiad dysgwyr ar draws rhwydwaith ACT, gan nodi eu bod yn llawn cymhelliant ac yn gwneud cynnydd cryf yn eu rhaglenni prentisiaethau.

Cafodd tiwtoriaid ac aseswyr eu canmol am osod disgwyliadau uchel a darparu cefnogaeth gadarn – yn enwedig i ddysgwyr sydd angen cymorth ychwanegol. Roedd yr adroddiad hefyd yn canmol uwch arweinyddiaeth ACT am feithrin diwylliant o arloesedd a chydweithio, wrth alinio’r ddarpariaeth hyfforddiant ag anghenion cyflogwyr ledled Cymru.

Yn bwysig, canfu’r arolwg dystiolaeth o welliant parhaus, gyda chanlyniadau dysgwyr yn dangos tuedd gadarnhaol dros y tair blynedd diwethaf. Mae hyn, meddai Estyn, yn dangos gallu ACT nid yn unig i gynnal safonau ond eu gwella er gwaethaf pwysau economaidd a chyllid parhaus.

Croesawodd Richard Spear, Rheolwr Gyfarwyddwr ACT a’i is-gwmni ALS Training, yr adroddiad, gan ddweud: “Rydym wrth ein bodd gyda chanlyniadau ein harolygiad Estyn.

“Mae’r adroddiad hwn yn cydnabod yr ymrwymiad a’r safonau uchel y mae ein timau yn eu rhoi i’w gwaith bob dydd, a chryfder ein partneriaethau ar draws y rhwydwaith.

“Er gwaethaf heriau ariannu, rydym wedi aros yn driw i’n cenhadaeth – i wella bywydau trwy ddysgu. Ni allwn ni fod yn fwy balch o’n tîm, ein partneriaid rhwydwaith a’n dysgwyr.”

Ar hyn o bryd mae ACT yn darparu prentisiaethau i fwy na 10,300 o ddysgwyr bob blwyddyn, mewn sectorau fel Iechyd a Gofal Cymdeithasol, Arweinyddiaeth a Rheolaeth, Sgiliau Digidol, Addysgu a Dysgu, ac Ynni a Charbon.

Mae ALS Training, a gafodd ei gaffael gan ACT yn 2018, yn darparu prentisiaethau mewn gwasanaethau digidol, ariannol, busnes a phroffesiynol – gan gryfhau cyrhaeddiad y grŵp ymhellach ar draws diwydiannau galw uchel.