Prentisiaeth WRU a Cardiff Met yn Helpu Dysgwyr i Gyrraedd y Nod

Mae Undeb Rygbi Cymru a Phrifysgol Metropolitan Caerdydd wedi dod ynghyd i ddatblygu cymhwyster sylfaen newydd a fydd yn rhoi llwybrau i fyfyrwyr tuag at yrfaoedd ym maes chwaraeon ac yn gam tuag at raglenni gradd chwaraeon mewn addysg uwch.

Bydd y Dystysgrif Sylfaen mewn Rheoli a Datblygu Chwaraeon, a gyflwynir mewn partneriaeth ag ALS Training, yn galluogi myfyrwyr i symud ymlaen i ystod o gyrsiau o fewn Ysgol Chwaraeon a Gwyddorau Iechyd Prifysgol Metropolitan Caerdydd.

Dywedodd Daniel Heggs, Deon Cysylltiol Partneriaethau ym Mhrifysgol Metropolitan Caerdydd: “Mae cyflwyno’r dystysgrif sylfaen yn agor drysau i unigolion sydd am ddilyn gyrfa ym maes chwaraeon ond na fyddent efallai wedi ystyried cyfleoedd prifysgol fel arall. Mae’n golygu y gall pobl dalentog na fyddent wedi ystyried gwneud cais i brifysgol gael mynediad at raddau chwaraeon uchel eu parch Prifysgol Metropolitan Caerdydd, gan ddileu’r rhwystr i addysg uwch.”

Mae’r dystysgrif sylfaen wedi’i dylunio gan Brifysgol Metropolitan Caerdydd i ddiwallu anghenion Undeb Rygbi Cymru drwy ymgorffori dysgu seiliedig ar waith, gyda lleoliadau mewn ysgolion a cholegau wedi’u hintegreiddio i’r cwrs.

Dywedodd Geraint John, Cyfarwyddwr Cymunedol Undeb Rygbi Cymru: “Mae Tystysgrif Sylfaen Prifysgol Metropolitan Caerdydd wedi’i datblygu i gyd-fynd â gofynion prentisiaethau Undeb Rygbi Cymru, ac mae’n cyfuno gwybodaeth o’r ystafell ddosbarth â chymhwysiad yn y byd go iawn.

“Fel pont rhwng theori ac ymarfer, nid cymhwyster yn unig yw’r dystysgrif hon; mae’n daith drwy ddysgu seiliedig ar waith. Mae lleoliadau strategol mewn ysgolion a cholegau, ynghyd â phrofiadau mewn digwyddiadau byw, wedi’u plethu’n ddi-dor i’r cwricwlwm. Felly, nid yw’r dystysgrif sylfaen newydd yn bodloni safonau yn unig, mae’n gosod meincnod newydd ar gyfer addysg gyfannol, gan baratoi unigolion ar gyfer llwyddiant drwy brofiadau go iawn cyffrous ac amrywiol o fewn rygbi Cymru.”

Dywedodd Liam Brooks, 19 oed, sydd wedi ymuno â’r garfan gyntaf o fyfyrwyr ar y rhaglen sylfaen newydd: “Rwyf wedi caru rygbi ers pan oeddwn yn chwech oed ac roeddwn wastad eisiau bod yn rhan ohono, naill ai fel chwaraewr neu fel gyrfa.

“Roedd gwneud cais am y cwrs hwn yn benderfyniad amlwg oherwydd mae’n gyfle i ddilyn gyrfa mewn camp rwy’n hynod frwdfrydig amdani a chael fy hyfforddi gan y bobl sydd ar frig y proffesiwn rygbi yng Nghymru. Mae wedi bod yn wych hyd yma ac eisoes wedi cynnig llawer o brofiadau newydd fel hyfforddwr chwaraeon.”

Derbynnir 15 o fyfyrwyr i raglen Brentisiaeth Undeb Rygbi Cymru bob blwyddyn. Dros gyfnod o 12 mis, mae myfyrwyr yn cysgodi tîm medrus iawn sy’n cyflwyno digwyddiadau mewn cymunedau ac ysgolion lleol, o sesiynau sgiliau i hyfforddi a dyfarnu. Mae myfyrwyr hefyd yn chwarae rhan wrth gyflwyno gemau rygbi rhyngwladol a gynhelir yn Stadiwm Principality, gan gynnwys Chwe Gwlad Guinness, yn ogystal â digwyddiadau ym Mharc yr Arfau Caerdydd a CSM yng Ngogledd Cymru. Mae’r myfyrwyr hefyd yn gyfrifol am gyflwyno un o’r digwyddiadau allweddol yng nghalendr rygbi cymunedol, Road to Principality, lle maent yn ennill profiad amhrisiadwy ym mhob agwedd ar ddigwyddiadau ar raddfa fawr, gan gynnwys darlledu chwaraeon, ffrydio byw, cyfryngau digidol a chymdeithasol, tocynnau, marchnata a chyfathrebu, profiad cefnogwyr a rheoli timau.

Ychwanegodd Sarah John, Cyfarwyddwr ALS: “Rydym yn falch iawn o gydweithio ar y cymhwyster hwn, sy’n rhan o’r Brentisiaeth Uwch mewn Datblygu Chwaraeon.”

 

“Yr uchelgais yw cefnogi datblygiad parhaus pobl ifanc sy’n cael eu recriwtio i’r maes chwaraeon ac uwchsgilio’r rhai sydd eisoes yn gweithio yn y sector nad ydynt efallai wedi cael profiad o ddysgu achrededig ar lefel uwch. Mae’r cwrs yn cynnig llwybr arall i ddysgwyr tuag at lefel gradd.”

 

“Mae’r dull arloesol hwn wedi dod â Diwydiant, Addysg Uwch a Dysgu Seiliedig ar Waith ynghyd – cydweithrediad sy’n agor y drws i gyfleoedd yn y dyfodol.”

Bydd y cylch nesaf o geisiadau ar gyfer rhaglen Brentisiaeth Undeb Rygbi Cymru, a chymhwysedd ar gyfer Tystysgrif Sylfaen mewn Rheoli a Datblygu Chwaraeon, yn dechrau ym mis Mehefin 2024. Gall myfyrwyr sydd â diddordeb mewn gwneud cais gyflwyno ‘Datganiad o Ddiddordeb’.