Twf Swyddi Cymru+ yn helpu dysgwyr i symud ymlaen i’r brifysgol

I lawer o ddysgwyr, nid yn unig cynnig darpariaeth i ddysgu sgiliau a phrofiad newydd mae Twf Swyddi Cymru+, mae hefyd yn gyfle i fagu hyder a darganfod mwy amdanoch chi’ch hun. 

Mae hynny’n sicr yn wir am y dysgwr Abby Jones, a ymunodd â rhaglen Twf Swyddi Cymru + ym mis Ionawr y llynedd, yn ansicr beth oedd hi eisiau ei wneud yn y dyfodol. 

“Es i i’r coleg am fis i wneud trin gwallt a wnaeth i mi sylweddoli bod trin gwallt yn hobi ac nid yn rhywbeth rydw i eisiau fel gyrfa,” esboniodd Abby. “Ar ôl hynny roeddwn i’n gweithio’n llawn amser fel gweinyddes… yna ymunais ag ACT.” 

Pan gofrestrodd gyntaf ar raglen Twf Swyddi Cymru+, roedd gan Abby un amcan clir mewn golwg. “Fy mhrif nod oedd darganfod beth roeddwn i eisiau ei wneud fel gyrfa hirdymor,” meddai. “Roeddwn i’n disgwyl iddo fod yn union fel yr ysgol ond roedd ACT yn wahanol. Fe wnes i gwrdd â phobl anhygoel a oedd yn wych.” 

Trwy gydol ei hamser yn ACT, cofleidiodd Abby gyfleoedd newydd, gan gynnwys lleoliad gwaith gweinyddol. 

“Fe wnaeth fy helpu i sylweddoli nad oeddwn i eisiau mynd i mewn i unrhyw beth fel ‘na,” meddai Abby. “Fe helpodd fy hyder ychydig, cwrdd â phobl newydd a gweithio mewn amgylchedd newydd.” 

Mae TSC+ hefyd wedi caniatáu i Abby weithio ar ei chymwysterau sgiliau hanfodol, gan ei helpu i wella mewn Saesneg, Mathemateg a Llythrennedd Digidol. 

“Mae astudio gydag ACT yn llawer gwell na’r ysgol,” esboniodd. “Pan nad ydych chi’n deall rhywbeth, bydd yr athro sy’n arwain y dosbarth yn gwneud yn siŵr bod pawb yn deall cyn iddyn nhw symud ymlaen, sy’n anhygoel oherwydd rydw i wastad wedi cael ychydig o drafferth gyda Saesneg. 

“Pryd bynnag y byddwn i’n gorffen dosbarth, byddai fy nhiwtor bob amser yn gwirio fy mod i’n mwynhau fy hun a’m bod yn deall y cyfan. Pe bawn i’n cael trafferth, byddent yn rhoi gwybod i’r athro ar fy rhan.” 

Ochr yn ochr â’i hastudiaethau, enillodd Abby brofiad gwerthfawr trwy waith rhan-amser mewn lletygarwch. 

“Pan weithiais yn fy swydd ran-amser, dysgais lawer am sut gall gwahanol swyddi fod. Dysgodd i mi sut i gyfarch cwsmeriaid, sut i ddelio gyda sefyllfaoedd gwael a sut i weithio gyda phobl anghyfarwydd. 

“Roedd rheoli amser hefyd yn sgil wych i’w ddysgu. Fe wnaeth fy helpu i wneud yn siŵr fy mod yn y gwaith ar amser ac nad oeddwn i’n gorweithio fy hun. Roedd fy hyder yn y gweithle ar ôl ymuno ag ACT yn llawer gwell ac yn fy helpu i beidio â chwestiynu fy hun cymaint.” 

Un o brif brofiadau Abby oedd mynd i Barcelona gyda chyd-ddysgwyr a staff ACT. Dyma’r tro cyntaf iddi deithio dramor.  
 
“Doeddwn i erioed wedi bod ar wyliau o’r blaen ac rwyf bob amser wedi bod eisiau teithio,” meddai. “Oherwydd roeddwn gyda grŵp mawr o bobl, roeddwn i’n gwybod y byddwn i’n teimlo’n ddiogel. Roeddwn i’n gyffrous i gwrdd â phobl newydd a gallu rhannu’r profiad anhygoel gyda nhw.” 

Gwthiodd y daith Abby allan o’i chylch cysurus a chreu atgofion parhaol. 

“Fe wnaethon ni fynd i hwylio a mynd ar gychod banana ac roedd yn anhygoel. Fe wnaethon ni hefyd fynd ar go-cart a hwn oedd fy hoff weithgaredd o bell ffordd. Fe wnes i hefyd fwynhau’r nosweithiau lle aethom allan i archwilio ac roeddwn i’n gallu gweld sut olwg oedd ar Barcelona.” 

Wrth edrych ymlaen, mae gan Abby gynlluniau uchelgeisiol ar gyfer ei dyfodol. Wedi’i hysbrydoli gan ei phrofiadau yn ACT ac un o’i hoff sioeau teledu, Criminal Minds, mae hi wedi gwneud y penderfyniad i astudio seicoleg gyda’r Brifysgol Agored ym mis Medi. Yna mae hi’n gobeithio symud ymlaen i yrfa. 

Dywedodd: “Ar ôl i mi orffen fy ngradd byddaf yn gwneud fy ngradd Meistr mewn Seicoleg Fforensig fel y gallaf fod yn Seicolegydd Fforensig llawn gymwysedig a mynd i mewn iddo fel swydd llawn amser.” 

Wrth fyfyrio ar ei phrofiad o fewn rhaglen Twf Swyddi Cymru+, dywedodd Abby: “Mae’r staff yn ACT yn anhygoel ac wedi fy nhrin gyda pharch ac amynedd bob amser, pryd bynnag roeddwn i’n cael trafferth neu roeddwn i’n drysu, byddent bob amser yn cymryd eu hamser i helpu a gwneud yn siŵr fy mod i’n iawn. 

“Rwy’n falch iawn fy mod wedi ennill llawer o hyder trwy gydol fy amser yn ACT o’r gymysgedd o daith Barcelona, prosiectau cyfoethogi a theithiau, yn ogystal â chwrdd â phobl newydd yn y ganolfan.”